نحب نولي معتمد / يزيني من هزّ ورّدّ
سمُّوني، علاش نسيتوني/ حتى دشيرة اعطيوني
راني باهي مشني دوني/ انمّي الجيهة تتْفرهدْ
نحبّ نولّي معتمد
سي يوسف وعلاش الحقرة/ سمّيني راني في غرقة
علاش تسموهم بالدرقة/ وتقلّي ما نعرف حدّْ
نحب نولي معتمدْ
رامي مثقف عصامي/ جايب عشرة في سيزيامي
حرنْ بهيمي في نوفيامي/ من لقراية متْعقّدْ
نحب نولي معتمدْ
شنوة الي فيها المعبوكة/ كي تقوللو خطّة محبوكة
خبرة في ضرب الدربوكة/ غنّاية " الله أحدّ"
نحب نولي معتمدْ
باش تشدّ المسؤولية/ يلزم عندك مفهومية
من حزبي وتبندر ليّ/ وباب الريح انت تسدّ
نحب نولي معتمدْ
علاش تهبّط في دموعك/ تشكي وتسيب في جنونك
بندرْ،صفّقْ، تا ينادولك/ وتولي سي المعتمد
نحب نولي معتمدْ
عادل النقاطي
